ബെംഗളൂരു: ബെംഗളൂരുവിൽ നിർദ്ദിഷ്ട ഹെബ്ബാൾ ഷോർട്ട് തുരങ്കപ്പാത പദ്ധതിക്കായി 2.2 കിലോമീറ്റർ പരിധിയിലുള്ള 1,128 മരങ്ങൾ മുറിച്ചുമാറ്റാൻ നീക്കം. 70-ലധികം വ്യത്യസ്ത വർഗ്ഗങ്ങളിൽപ്പെട്ട മരങ്ങളാണ് ഇവിടെയുള്ളത്. ഒരു ചെറിയ നഗരപ്രദേശത്ത് ഇത്രയധികം ജൈവവൈവിധ്യമുള്ള മരങ്ങൾ ഒന്നിച്ച് മുറിച്ചുമാറ്റുന്നത് വൻ തോതിലുള്ള പാരിസ്ഥിതിക ആഘാതത്തിനും പ്രദേശത്തെ താപനില വലിയ തോതിൽ ഉയരുന്നതിനും കാരണമാകുമെന്ന് വിദഗ്ദ്ധർ മുന്നറിയിപ്പ് നൽകുന്നു.
തുരങ്കത്തിന്റെ പാതയിൽ വരാത്ത ചില മരങ്ങളെ ഒഴിവാക്കിയാണ് നിലവിൽ മരങ്ങളുടെ എണ്ണം 1,128 ആയി നിശ്ചയിച്ചിരിക്കുന്നത്. എന്നാൽ, പ്രദേശത്തെ മരങ്ങൾ മുറിച്ചുമാറ്റുന്നത് വായു ശുദ്ധീകരണത്തെയും ഭൂഗർഭജല നിരപ്പിനെയും പ്രതികൂലമായി ബാധിക്കും. മരങ്ങൾ ഇല്ലാതാകുന്നതോടെ പ്രദേശത്തെ താപനിലയിൽ കുറഞ്ഞത് രണ്ട് ഡിഗ്രി സെൽഷ്യസ് വരെ വർദ്ധനവുണ്ടാകാനും തദ്ദേശീയ ജീവജാലങ്ങളുടെ വാസസ്ഥലങ്ങൾ പൂർണ്ണമായി നശിക്കാനും സാധ്യതയുണ്ട്.
പ്രധാന മരവിഭാഗങ്ങൾ (Species List Includes)
-
റോസ് വുഡ് / വീട്ടി (Indian Kino)
-
മഹാഗണി (Big-leaf Mahogany)
-
താന്നി (Beleric Myrobalan)
-
ഇലന്ത / ബദരി (Indian Jujube)
-
പൂവരശ് / മരത്തൊട്ടി (Maple-leafed Bayur Tree)
-
പേപ്പർ മൾബറി (Paper Mulberry)
-
മഞ്ഞ കൊന്ന / യെല്ലോ തബൂബിയ (Yellow Tabebuia)
-
മണിമരുത് (Queen’s Crape Myrtle)
-
അഗത്തി (Agati)
-
ആൽമരം / പേരാൽ (Mysore Fig)
-
ഉങ്ങ് (Pongam Tree)
പൊതുജനക്ഷേമത്തിൽ വീഴ്ചയെന്ന് ആക്ഷേപം
മരങ്ങൾ മുറിക്കുന്നതിനെതിരെ പരാതികളും ആക്ഷേപങ്ങളും ഉന്നയിക്കാൻ ഗ്രേറ്റർ ബെംഗളൂരു അതോറിറ്റി (GBA) പൊതുജനങ്ങൾക്ക് അവസരം നൽകിയിരുന്നെങ്കിലും, മരങ്ങളുടെ വിശദമായ പട്ടിക വെബ്‌സൈറ്റിൽ ഇതുവരെ പ്രസിദ്ധീകരിച്ചിട്ടില്ല. ഇത് ലംഘനമാണെന്നും കൃത്യമായ വിവരങ്ങൾ ലഭ്യമാക്കാതെ പൊതുജനങ്ങൾക്ക് എതിർപ്പ് അറിയിക്കാൻ സാധിക്കില്ലെന്നും പരിസ്ഥിതി പ്രവർത്തകർ ആരോപിക്കുന്നു. അതിനാൽ പട്ടിക വെബ്‌സൈറ്റിൽ നൽകിയ ശേഷം പുതിയ നോട്ടീസ് പുറപ്പെടുവിക്കണമെന്നാണ് ആവശ്യം.
അതിനിടെ, 1,140 കോടി രൂപ ചെലവിൽ നിർമ്മിക്കുന്ന ഈ തുരങ്ക പദ്ധതി നിർത്തിവെക്കണമെന്നും പദ്ധതിയുടെ പാരിസ്ഥിതിക ആഘാതം പഠിക്കണമെന്നും ആവശ്യപ്പെട്ട് ഓൺലൈൻ ഒപ്പുശേഖരണവും ശക്തമാകുന്നുണ്ട്. ഹെബ്ബാൾ തടാക പ്രദേശം, വെറ്ററിനറി കോളേജ് ക്യാമ്പസ്, കർഷക സർവകലാശാല ക്യാമ്പസ് തുടങ്ങിയ പരിസ്ഥിതി പ്രാധാന്യമുള്ള മേഖലകളിലൂടെയാണ് ഈ തുരങ്കം കടന്നുപോകുന്നത്.
